شعر يا مسيحيين العراق

- يا مسيحيين العراقي يا ابن اول زرع

- جذرك بكل كلب باقي شلون جذرك ينشلع

- انت مثل الكصب عالي يكطع وما ينكطع

- اش ما تكص بيه المتجل يرجع اكثر يرتفع

يا مسيحيين العراق

- ياصبر خيط الشمع مهما تشتد الليالي

- وعلى بابك نجتمع

- وتلكى الف دورة تلالي والف شميسة تشع



يا مسيحيين العراق

- ياصبر خيط الشمع انت مثل الماي الصافي واحلى من فيَ النبع

- وانت مثل العطر راقي وشلون منك ينشبع

- وانت في دم كل عراقي وهم شفت دم ينزع

يا مسيحيين العراق

- يا طبع واجمل طبع

- انت صح دافي وطيب وحس الك ما ينسمع

- وانت صح ناعم حلو ومن حلاوتك تنفلع

- لكن اقوى من الحديد وانت اسبع من السبع

- ياسبع وابن سبع

- انتم اصحابي ورفاقي وربعي ياأجمل ربع

يا مسيحيين العراق

- اريد احلفك بالمآسي وبالسجون والقمع

- واريد احلفك بالليالي واشكثر حركن شمع

- واريد احلفك بالمآقي شكثر شالن دمع

- لاتغادر شجرة أمك مهما يتردى الوضع

- بير جدك وانت من اشرف نبع

- اثبت وكلهم عراقي وأسالوا الحق والشرع

- انت مثل الجبل باقي والجبل ابد ما يندفع